విండీస్‌తో తొలి టెస్టు.. టాస్ ఓడిన భారత్.. ఫ‌స్ట్ ఫీల్డింగ్‌

భారత టెస్టు క్రికెట్‌లో ఒక కొత్త శకం ఆరంభమైంది. సుమారు 15 ఏళ్ల తర్వాత తొలిసారిగా విరాట్ కోహ్లీ, రోహిత్ శర్మ, రవిచంద్రన్ అశ్విన్ వంటి కీలక సీనియర్లు లేకుండా టీమిండియా స్వదేశంలో టెస్టు మ్యాచ్ ఆడుతోంది. గురువారం అహ్మ‌దాబాద్‌లోని నరేంద్ర మోదీ స్టేడియంలో వెస్టిండీస్‌తో ప్రారంభమైన రెండు మ్యాచ్‌ల సిరీస్‌లోని తొలి టెస్టులో ఈ అరుదైన ఘట్టం ఆవిష్కృతమైంది. ఈ మ్యాచ్‌లో టాస్ గెలిచిన వెస్టిండీస్ కెప్టెన్ రోస్టన్ చేజ్ ముందుగా బ్యాటింగ్ చేయాలని నిర్ణయించుకున్నాడు.

టాస్ గెలిచిన అనంతరం రోస్టన్ చేజ్ మాట్లాడుతూ, తమ జట్టు కూర్పు గురించి వివరించాడు. "పిచ్ చూడటానికి బాగుంది. ఆరంభంలో కాస్త తేమ ఉంటుంది, కాబట్టి తొలి రెండు గంటలు జాగ్రత్తగా ఆడాలి. మాది యువ జట్టు, మంచి క్రికెట్ ఆడాలనుకుంటున్నాం. ఈ పిచ్‌పై స‌మ‌యం గ‌డిచేకొద్ది బ్యాటింగ్ చేయ‌డం అంత ఈజీ కాదు. ఎందుకంటే ఇది కచ్చితంగా టర్న్ అవుతుంది" అని తెలిపాడు. ఇద్దరు సీమర్లు, ఇద్దరు స్పిన్నర్లు, ఒక ఆల్‌రౌండర్‌తో బరిలోకి దిగుతున్నామని, ఖారీ పియర్, జొహాన్ లేన్ అనే ఇద్దరు కొత్త ఆటగాళ్లకు అవకాశం ఇచ్చామని చెప్పాడు.

స్వదేశంలో కెప్టెన్‌గా తన తొలి టెస్టు ఆడుతున్న శుభ్‌మన్ గిల్, టాస్ ఓడిపోవడంపై నిరాశగా లేదన్నాడు. "ఈ ఏడాది స్వదేశంలో నాలుగు టెస్టులు ఆడాల్సి ఉంది. అన్నింటిలోనూ గెలవాలని లక్ష్యంగా పెట్టుకున్నాం. మా సన్నద్ధత చాలా బాగుంది. పిచ్ కవర్ల కింద ఉండటంతో ఆరంభంలో బౌలర్లకు సహకారం లభించవచ్చు" అని గిల్ ఆశాభావం వ్యక్తం చేశాడు. భారత జట్టులో జస్‌ప్రీత్ బుమ్రా, మహమ్మద్ సిరాజ్‌తో పాటు ముగ్గురు స్పిన్నర్లు రవీంద్ర జడేజా, వాషింగ్టన్ సుందర్, కుల్‌దీప్ యాదవ్‌లకు చోటు కల్పించగా, నితీశ్ కుమార్ రెడ్డి సీమ్-బౌలింగ్ ఆల్‌రౌండర్‌గా ఆడుతున్నాడు.

తుది జట్లు:
భారత్: యశస్వి జైస్వాల్, కేఎల్ రాహుల్, సాయి సుదర్శన్, శుభ్‌మన్ గిల్ (కెప్టెన్), ధ్రువ్ జురెల్ (వికెట్ కీపర్), రవీంద్ర జడేజా, వాషింగ్టన్ సుందర్, నితీశ్ కుమార్ రెడ్డి, కుల్‌దీప్ యాదవ్, జస్‌ప్రీత్ బుమ్రా, మహమ్మద్ సిరాజ్.

వెస్టిండీస్: త్యాగ్‌నరైన్ చంద్రపాల్, జాన్ క్యాంప్‌బెల్, అలిక్ అథానాజే, బ్రాండన్ కింగ్, షాయ్ హోప్ (వికెట్ కీపర్), రోస్టన్ చేజ్ (కెప్టెన్), జస్టిన్ గ్రీవ్స్, జోమెల్ వారికన్, ఖారీ పియర్, జొహాన్ లేన్, జేడెన్ సీల్స్.